2022-ci il avqustun 27-də Əl-Fərabi adına Qazaxıstan Dövlət Universitetinin müəllimi, “Əlyazmalar və Mədəni İrs” Mərkəzinin sədri dos. Zübeydə Şadkam Xəzər Universitetinin Mövlana Ədəbi-Fəlsəfi Araşdırmalar İnstitutunda (MƏFAİ) “Azərbaycan dilində yazılmış “Rüstəmnamə” dastanı” adlı məruzə ilə çıxış etdi.
MƏFAİ-nin direktoru dos. Nəzakət Məmmədlinin dəvəti ilə Xəzər Universitetinə təşrif buyuran məruzəçi Qazaxıstanda qorunan Azərbaycan əlyazmaları haqqında ümumi məlumat verdikdən sonra XIX əsrdə daşbasması üsulu ilə nəşr edilmiş “Rüstəmnameyi-türki” adlı əsərin məzmunu, üslubu, dil xüsusiyyətləri barədə öz tədqiqlərini əyani nümunələr əsasında iştirakçılara təqdim etdi. Türk dünyası əlyazmalarının araşdırılması, əlyazmaşünaslıq və mətnşünaslıq sahəsində zəngin təcrübəyə malik Nəzakət Məmmədli də çıxış edərək, bu istiqamətdə Azərbaycanda görülmüş işlərin qısa mənzərəsini təsvir etdi. Tədbirin sonunda iştirakçıların sualları cavablandıırldı.
