Xəzər Universitetində dahi Azərbaycan şairi və mütəfəkkiri Əfzələddin Xaqani Şirvaninin anadan olmasının 900 illik yubileyinə həsr edilmiş “Xaqani Şirvani 900 – Sələflər və xələflər: orta əsr əlyazmaları və Azərbaycan mədəniyyətinin tarixi problemləri” mövzusunda Respublika Elmi Konfransı keçirilib. Xəzər Universitetinin Mövlana Ədəbi-Fəlsəfi Araşdırmalar İnstitutu ilə AMEA Məhəmməd Füzuli adına Əlyazmalar İnstitutunun birgə təşkil etdiyi konfrans, Azərbaycan Respublikasının Prezidenti İlham Əliyevin 28 yanvar 2026-cı il tarixli Sərəncamına uyğun olaraq, şairin zəngin ədəbi-fəlsəfi irsinin daha geniş miqyasda öyrənilməsi və elmi ictimaiyyətə təqdim olunması məqsədi daşıyır.
Konfransı Mövlana Ədəbi-Fəlsəfi Araşdırmalar İnstitutunun koordinatoru Dr.Fəridə Seyidova açaraq, Xəzər Universitetinin rəhbərliyi adından iştirakçıları salamlayıb və konfransın məramını diqqətə çatdırıb. AMEA Əlyazmalar İnstitutunun elmi katibi Dos. Aynur Hacıqədirli dövlət sərəncamının əhəmiyyətinə və Xaqani irsinin araşdırılmasının vacibliyinə diqqət çəkib. AMEA Nizami Gəncəvi adına Ədəbiyyat İnstitutunun Ortaq başlanğıc və İntibah dövrü Azərbaycan ədəbiyyatı şöbəsinin müdiri Prof. İmamverdi Həmidov Xaqaninin Azərbaycan ədəbiyyat tarixindəki bənzərsiz yerindən və rolundan bəhs edib. İnstitutun digər xaqanişünas alimi, aparıcı elmi işçi Dos. Elnarə Zeynalova isə Xaqani irsinin öyrənilməsi, tədqiqi tarixi istiqamətindəki mühüm elmi mərhələləri konfrans iştirakçılarının diqqətinə çatdırıb. Açılış hissəsinin yekununda qonaqlar universitetin “Mövlana otağı” ilə yaxından tanış olublar. Sonra konfrans öz işini sessiyalarla davam etdirib.
Konfransda ümumilikdə 5 sessiya (bölmə) üzrə müzakirələr aparılıb. Konfrans çərçivəsində 29 tədqiqatçı universitetdə əyani, 4 alim isə onlayn platforma üzərindən çıxış edib. Ümumilikdə 34 məruzə elmi toplantıya təqdim olunub. Sessiyalarda əsasən mətnşünaslıq, mənbəşünaslıq, ədəbiyyatşünaslıq, folklorşünaslıq və mədəniyyətşünaslıq istiqamətləri üzrə məruzələr dinləniləcək; şairin sənətkarlıq xüsusiyyətləri, əsərlərinin dünya dillərinə tərcüməsi, eləcə də Azərbaycan xaqanişünaslığının aktual problemləri və perspektivləri müzakirə olunacaq. Konfrans Azərbaycan xaqanişünaslığının gələcək perspektivlərini müəyyən etmək baxımından böyük rəğbətlə qarşılanıb və sonda konfrans materiallarının AMEA Əlyazmalar İnstitutunun “Əlyazmalar yanmır” jurnalında xüsusi say olaraq, işıq üzü görəcəyi bildirilib.
