6 aprel 2026-cı il tarixində Özbəkistanın qədim elm və mədəniyyət mərkəzi olan Buxara şəhərində Qafqaz Universitetinin Əbül-Həsən Xaraqani adına Tətbiqi Araşdırmalar Mərkəzinin (Türkiyə) və Qafqaz Universiteti İlahiyyat fakültəsinin öndərliyi, Xəzər Universitetinin Mövlana Ədəbi-Fəlsəfi Araşdırmalar İnstitutu (Azərbaycan) və Beynəlxalq Buxara Universitetinin (Özbəkistan) birgə təşkilatçılığı ilə Türk dünyasının mənəvi irsinə həsr olunmuş beynəlxalq simpozium keçirilmişdir. Beynəlxalq Buxara Dövlət Universitetinin ev sahibliyi ilə baş tutan “I beynəlxalq Türk dünyasında ortaq dəyərlərin ehyası və inşası simpoziumu”nda Türkiyə, Azərbaycan, Özbəkistan, Qazaxıstan, Malayziya, Pakistan və İngiltərə daxil olmaqla 7 ölkədən məruzəçilər iştirak etmişdir.
Konfransın açılış mərasimi Özbəkistan ənənələrinə uyğun olaraq bədii hissə ilə başlamış; tələbələrdən ibarət rəqs və musiqi qrupları xarici qonaqları qarşılamışdır. Daha sonra tədbiri açıq elan edən Beynəlxalq Buxara Universitetinin rektoru, prof. Şərif Barotov qonaqları salamlayaraq rəhbərlik etdiyi ali təhsil müəssisəsi haqqında məlumat vermiş, konfransın Türk dünyasının inteqrasiyası yolundakı əhəmiyyətini vurğulamışdır.
Daha sonra çıxış edən Türkiyənin Özbəkistandakı səfirliyinin mətbuat müşaviri, prof. Mehmet Yüce Türk dövlətlərinin ortaq tarixindən bəhs edərək, dövlət başçılarının Türk birliyinin təsis edilməsi istiqamətində atdığı addımları dəyərləndirmişdir. O, yalnız ortaq mədəni dəyərlərin qorunmasının kifayət etmədiyini, eyni zamanda müasir texnoloji və elmi nailiyyətlərə adaptasiya məsələsinin də mühüm olduğunu qeyd etmişdir.
Ardınca Simpoziumun Təşkilat Komitəsinin sədri və Qafqaz Universitetinin Əbül-Həsən Xaraqani adına Tətbiqi Araşdırmalar Mərkəzinin direktoru, dos. Muhammed Alparslan Kartal çıxış edərək, ilk növbədə simpoziumun təşkilatçı qurumu olan Qafqaz Universitetinin rektoru, cənab Hüsnü Kapunun salamlarını çatdırmışdır. O, konfransın Türk dünyasına xidmət məqsədi daşıdığını və genişmiqyaslı bir layihə çərçivəsində həyata keçirilən tədbirlərdən biri olduğunu bildirmişdir. Ev sahibi Beynəlxalq Buxara Universitetinə təşəkkürünü bildirən Kartal, bu konfransların akademik əlaqələrin gücləndirilməsində mühüm rol oynadığını ifadə etmişdir. Dos.M.A. Kartal Beynəlxalq Buxara Universitetinin prorektoru dr.Əli Əsgərxon Qasımova, Simpoziumun Təşkilat Komitəsi sədrinin müavinləri dos.Murad Sarıgül və dos.Məleykə Məmmədovaya, eləcə də simpoziumun koordinatoru dr.Fəridə Seyidovaya əməklərinə görə minnətdarlığını bildirmişdir.
Qazaxıstandakı Beynəlxalq Xoca Əhməd Yasəvi adına Türk-Qazax Universitetini təmsil edən dos.Xəlil Çetin də açılış mərasimində çıxış edərək Türk birliyinin həm xalqlar, həm də dövlətlər səviyyəsindəki inkişafından bəhs etmişdir.
Hədiyyə təqdimatı ilə başa çatan açılış mərasimindən sonra konfrans işini 7 bölmədə əyani və onlayn formatda davam etdirmişdir. Ümumilikdə təqdim olunan 45 məruzədən 8-i Türkiyədən iştirak edən alimlər, 37-si isə digər ölkələrdən qoşulan məruzəçilər tərəfindən təqdim edilmişdir. Proqram çərçivəsində bölmə iclasları aşağıdakı başlıqlar üzrə təşkil olunmuşdur: Dil və təhsil, mədəniyyət və ədəbiyyat, tarix və sosial strukturlar, iqtisadiyyat və inteqrasiya, Türk mədəniyyətində ədəbiyyat, sənət və ənənələr, Türk dünyasında dil, ədəbiyyat və mədəni qarşılıqlı əlaqələr, Türk dünyasında dini elmlər.
Xəzər Universitetini konfransda Mövlana Ədəbi-Fəlsəfi Araşdırmalar İnstitutunun koordinatoru dr.Fəridə Seyidova təmsil etmişdir. Bölmə iclasları boyunca Türk dünyasının ortaq mədəni dəyərləri dil, ədəbiyyat, folklor, tarix, din və toplumsal yaddaş kontekstində araşdırılmış, fənlərarası baxış bucağı ilə yüksək səviyyəli elmi müzakirələr aparılmışdır.
