Xəzər Universitetinin Mövlana Ədəbi-Fəlsəfi Araşdırmalar İnstitutunun müdiri Nəzakət Məmmədli vəfat etmişdir. Azərbaycan ədəbiyyatşünaslıq elminə ağır itki üz vermişdir. Görkəmli alim, elmimizi dünyanın bir çox ölkəsində ləyaqətlə təmsil etmiş filologiya elmləri doktoru Nəzakət Məmmədli 2025-ci il fevralın 3-də ömrünün 53-cü ilində vəfat etmişdir. 2022-ci ildən Xəzər Universitetinin Mövlana Ədədbi-Fəlsəfi Araşdırmalar İnstitutunun müdiri vəzifəsində çalışan alim indiyə qədər Füzuli, Həmzə Nigari Qarabaği, Seyid Yəhya Şirvani, Sevdayi və bir çox azərbaycanlı müəllifin ədəbi irsi üzərində tədqiqatlar aparmış, Fəridəddin Əttar, Mövlana Cəlaləddin Rumi ilə bağlı əsərlər nəşr etdirmişdir.
Nəzakət Məmmədli 1971-ci ildə Sabirabad rayonunda dünyaya göz açmışdır. 1989-94-cü illərdə Bakı Dövlət Universitetinin Filologiya fakültəsini fərqlənmə ilə bitirmiş, 1994-97-ci illərdə AMEA Nizami adına Ədəbiyyat İnstitutunun aspiranturasında təhsil almışdır. 1997-ci ildə “Füzulinin “Leyli və Məcnun” əsərində təsəvvüf və onun bədii ifadə sistemi” adlı tədqiqatı ilə fəlsəfə doktoru elmi dərəcəsi almışdır. 2023-cü ildə isə “Fəridəddin Əttar və Azərbaycan ədəbiyyatı” mövzusunda elmlər doktorluğu dissertasiyasını müdafiə etmişdir. Alimin respublikada və ölkə xaricində nəşr olunmuş 145 elmi məqaləsi, 5 monoqrafiya, 9 tərcümə, transfonoliterasiya etdiyi kitabı vardır.
Nəzakət Məmmədli 1994-2010-cu illərdə AMEA Nizami adına Ədəbiyyat İnstitutunun böyük elmi işçisi olmuş, 2010-cu ildən vəfat edənə kimi AMEA Füzuli adına Əlyazmalar İnstitutunda işləmişdir.
Tanınmış alim, qayğıkeş və səmimi insan Nəzakət Məmmədlinin xatirəsi onu tanıyanların qəlbində həmişə yaşayacaqdır.
Allah rəhmət eləsin!
